Клуб на наставници - 175 наставници, една ЗАЕДНИЦА

Во срцето на секоја успешна училница стои посветен наставник. А зад секој посветен наставник стои заедница што го поддржува. Токму таква е мисијата на Клубот на наставници – најголемата заедница на наставници во Македонија, која денес брои 175 членови од 74 основни и средни училишта.

Клубот е простор за учење, место каде наставниците споделуваат, се вмрежуваат и придонесуваат за поквалитетно образование. Членовите имаат пристап до обуки, настани и алатки кои им помагаат да го збогатат наставниот процес, но и да се развиваат на лично и професионално ниво.

Оваа година, наставниците имаат шанса да организираат локални настани, да станат обучувачи и да бидат дел од тримесечните избори за „најпосветен наставник“. Најпосветениот наставник ќе биде награден со 10.000 денари – симболична потврда за трудот и ентузијазмот што го вложуваат секојдневно.

Дополнително, како членови на Клубот наставниците придонесуваат со свој став кон образовните политики кои ќе бидат споделени во јавноста.

Клубот на наставници е иницијатива на LEAD која започна во 2021 година и во изминатите 5 години во него членуваа преку 600 наставници. Преку Клубот ја адресираме потребата за поддршка и развој на наставничката професија и давање на глас на наставниците во општеството.

Клубот е отворен за членство за сите наставници од основните и средни училишта.