ПОВИК: СТАНИ ХЕРОЈ НА ТВОЈАТА ЗАЕДНИЦА!

Повик за локални младински иницијативи на тема циркуларна економија и справување со отпад

Имаш идеја со која можеш да придонесеш за подобрување на твојата локална заедница? Токму сега е моментот да станеш херој на твојата заедница!

Те повикуваме да земеш учество во највозбудливиот локален предизвик досега! Доколку имаш иновативна идеја за заштита на животната средина преку користење на концептот на циркуларна економија, ова е совршената можност за тебе.

ШТО БАРАМЕ?

Бараме млади кои имаат ентузијазам и креативни идеи и иницијативи за решавање на локални предизвици поврзани со животната средина, насочени кон:

• Намалување на потрошувачката на ресурси и материјали, вклучително и отпад;
• Пракси и иницијативи за повеќекратна употреба на производи;
• Поправка и ре-употреба на оштетени производи, наспроти нивно фрлање;
• Претворање на отпадните материјали во нови суровини преку процеси на рециклирање;
• Трансформирање на отпадни материјали или стари, неискористени предмети во нови производи;
• Кампањи за застапување и подигање на свеста поврзани со горенаведените области.

КОЈ МОЖЕ ДА СЕ ПРИЈАВИ?

Ги покануваме сите млади од Велес, Куманово, Липково, Кавадарци, Битола, Охрид, Македонски Брод и Пробиштип, на возраст од 15 до 29 години, кои сакаат да спроведат локална иницијатива. Формирај тим од пет лица со твоите врсници, аплицирај за учество во проектот и придонеси за твојата заедница. Изборот на тимот кој ќе ја добие можноста да ја реализира својата локална иницијатива ќе се заснова на следните критериуми:

• Степен на мотивација изразен во апликациската форма (10 поени);
• Релевантност на предложеното решение во однос на целите на повикот (10 поени);
• Иновативност на предложеното решение (10 поени);
• Изводливост на предложеното решение (10 поени).

Во процесот на селекција, предност ќе имаат младите лица кои учествувале на OWIS (One World in School – „Еден свет во училиштето“) работилница во рамките на локалните Младински центри.

ШТО ЌЕ ДОБИЕТЕ?

• Ресурси и материјали во вредност од 700 евра за реализација на вашиот локален проект, од кои 200 евра ќе бидат испланирани од тимот, а 500 евра во соработка со Младинскиот центар.
• Менторство од експерти кои ќе ви помогнат да го претворите вашиот проект од идеја во реалност во текот на тримесечен период.
• Промоција на вашата иницијатива – сите ќе го видат вашето дело!
• Можност за вмрежување и соработка со други млади ентузијасти од вашата локална заедница.

КАКО ДА СЕ ПРИЈАВИТЕ?

Многу едноставно! Пополнете ја апликациската форма достапна на СЛЕДНИОВ ЛИНК најдоцна до 31 јануари 2025 година.

ШТО ПРЕТСТАВУВА ЦИРКУЛАРНАТА ЕКОНОМИЈА?

Циркуларната економија е начин на размислување и живеење каде се трудиме повторно да ги употребиме ресурсите или да користиме ресурси кои се сметаат за отпад на значаен начин, притоа обидувајќи се да не креираме дополнителен отпад и да ги користиме предметите колку што е можно подолго време. Циркуларната економија е модел кој цели да ги намали штетните влијанија кон природата и да ги зачува ресурсите.

За разлика од традиционалната економија каде што земаме ресурси, произведуваме нешто, го користиме, а потоа го фрламе (линеарна економија), циркуларната економија функционира како циклус со цел да го минимизира отпадот и потрошувачката на ресурси.

Во циркуларната економија:

• Го намалуваме користењето на ресурси во производството, колку што е можно повеќе;
• Ги користиме предметите повторно, наместо да ги фрламе;
• Ги поправаме предметите кога ќе се расипат за да им го продолжиме животот;
• Рециклираме материјали за да направиме нешто ново, наместо да ги сметаме за отпад;
• Избегнуваме непотребни работи, купуваме само она што ни е потребно, имајќи ја одржливоста на ум.

Целта на циркуларната економија е да создаде систем каде што ресурсите се постојано во употреба, се рециклираат и се обновуваат, зачувувајќи ги природните ресурси и создавајќи помалку отпад.

ЗОШТО ДА УЧЕСТВУВАТЕ?

• Затоа што сте млади, креативни и храбри!
• Затоа што можете да направите вистинска промена!
• Затоа што иднината е во вашите раце!

Не чекај – време е за акција! Аплицирај сега и биди дел од генерацијата која ќе го промени светот!

Овој повик е дел од проектот "Граѓанското општество и младите за инклузивен и одржлив развој преку циркуларна економија во Северна Македонија", финансиран од Европската унија и имплементиран од People in Need (PIN), АРНО, ЛЕАД и Ековита. Неговата содржина е единствена одговорност на ЛЕАД и не ги одразува ставовите на Европската унија.