ПОВИК ЗА СРЕДНОШКОЛСКИ ПРОЕКТИ: Примени го знаењето од училишните клупи за проект во твојот град!

Што треба да направиш?

• Состави тим од 5 средношколци
• Вклучи еден наставник
• Детектирај потреба или предизвик во твојата заедница
• Смислете решение за чија реализација ќе ги употребите знаењата и вештините стекнати на училиште
• Аплицирај на следниот ЛИНК најдоцна до 21.09.2025, до 23:59 часот. И добиј 12,000 денари за реализирање на твојата иницијатива!

За сите заинтересирани тимови ќе организираме информативна сесија, која ќе се одржи на 04 септември од 12.00ч. Пријави се на следниот ЛИНК.

ШТО ПРЕТСТАВУВА SERVICE LEARNING?

Service Learning (услужно учење) е едукативен пристап каде што ученикот ја поврзува теоријата и знаeњата стекнати во училишните клупи преку конкретна активност и проект кој е наменет за влијание во општеството, односно го користите она што го учите на училиште за да направите проект со кој позитивно ќе придонесете кон вашата околина.

ПРИМЕРИ ЗА УСПЕШНИ SERVICE LEARNING ИНИЦИЈАТИВИ

ПРИМЕР 1: ПРОЕКТ ЗА ПОНУДА НА ЗДРАВСТВЕНА КОНТРОЛА НА НАСЕЛЕНИЕТО Tим МЕДИКУС - ССОУ„ Димитрија Чуповски“ - Велес

Поставување на штандови за контрола на притисокот и шеќерот е иницијатива преку која тимот МЕДИКУС се погрижи за здравјето и квалитетот на живот на населението. На овој начин учениците се залагаа за рано откривање на хипертензијата и дијабетесот и подигање на свеста за овие чести заболувања. Воедно, тие го утврдија знаењето стекнато од стручните предмети од здравствената струка во нивното училиште.

ПРИМЕР 2: ПРОГРАМА ЗА ИНКЛУЗИЈА НА ЛИЦА СО ПОПРЕЧЕНОСТ Млади гастро-визионери, СОУ „Митко Пенџуклиски“ – Кратово,

Преку работилници и пријателски пристап, учениците од угостителската струки од училиштето организираа часови за готвење на лица со попреченост од својот крад. Во Кратово, Младите гастро-визионери организираа јавен настан со работилници за готвење, на кои активно учествуваа лица со попреченост. На настанот присуствуваа над 120 посетители. Настанот вклучи и базар на еко – земјоделски производи од локални производители. Воедно, учениците-имплементатори на иницијативата, изработија електронска брошура со здрави рецепти.

ПРИМЕР 3: Подобрен визуелен идентитет на Здружение кое работи со лица со попреченост CodExceed, СОУ „Гошо Викентиев“ - Кочани

Учениците од електротехничката струка ги искористија своите вештини за развој на веб-страните. Со развојот на веб-страница за локалниот клуб на лица со телесен инвалидитет, учениците од тимот CodExceed, го поддржаа Клубот во негова промоција и комуникација со јавноста. Дополнително, организираа обуки за користење на страницата и настан за помоција на ново креираниот веб-сајт.

КАКОВ ВИД НА ПРОЕКТИ МОЖАТ ДА БИДАТ СПРОВЕДЕНИ?

Проектите со кои аплицирате треба да бидат насочени кон подобрување на одреден предизвик во вашата локална заедница, а во насока на следниве области:

1. Урбанизација
2. Животна средина
3. Маргинализирани лица
4. Лица со попречености
5. Волонтерство
6. Сиромаштија
7. Помош на други ранливи категории на граѓани

Секој од проектите треба да демонстрира дека се темели на користење знаења и вештини стекнати на училиште во рамки на предметите.

ШТО ДОБИВААТ ИЗБРАНИТЕ ТИМОВИ?

1. ЕДНОДНЕВНА ОНЛАЈН ОБУКА ЗА ПЛАНИРАЊЕ И РЕАЛИЗАЦИЈА НА ПРОЕКТИ

Интерактивната онлајн обука ќе ги им овозможи на учесниците од избраните тимови да научат како да дефинираат проектни цели, да развијат акциски планови ефективно да ги користат ресурсите. Преку обуката учесниците ќе стекнат знаења и вештини за планирање и имплементирање на сопствени проекти во заедницата.

2. ФИНАНСИСКА ПОДДРШКА ЗА ИМПЛЕМЕНТАЦИЈА НА ПРОЕКТОТ (октомври 2025 - декември 2025)

Секој од селектираните тимови ќе добие финансиска поддршка од 12 000 денари за имплементацијата на проектот во период од три месеци. Посакуваниот резултат е надминување на првично дефинираниот проблем и одржливост на проектот.

3. МЕНТОРСКА ПОДДРШКА

На избраните тимови ќе им бидат овозможени регуларни средби, консултација, насоки и практични совети од страна на ментор.

3. ПРИЗНАНИЕ ЗА УЧЕСТВО ВО ПРОЕКТОТ

Сите вклучени учесници и наставници ќе добијат признание за својот ангажман во проектот, во форма на сертификат.

КРИТЕРИУМИ ЗА СЕЛЕКЦИЈА

Одбирањето на проектите по затворање на повикот за аплицирање се спроведува според следните критериуми:

• РЕЛЕВАНТНОСТ НА ПРОЕКТОТ → 10 поени- Проектот се базира на реални потреби во општеството и вклучува анализа поткрепена со податоци
• ПОВРЗАНОСТ СО УЧИЛИШНИТЕ ПРЕДМЕТИ → 10 поени- Проектот прави јасна поврзаност со некој/и од училишните предмети
• ИНОВАТИВНОСТ НА ПРОЕКТОТ → 10 поени- Проектот користи иновативен пристап
• ИЗВОДЛИВОСТ НА ПРОЕКТОТ → 10 поени- Проектот може да се спроведе во рок од 3 месеци

За избрани ќе се сметаат 5 тимови кои добиле најголем број поени во процесот на селекција.

ЗОШТО СЕ ПОТРЕБНИ SERVICE LEARNING ПРОЕКТИ?

Отсуството на искуствено учење и практично применување на знаењето е пречка со којашто се соочуваат средношколците во нашиот образовен систем. Предвидениот материјал претежно им се предава на учениците во вид на факти и податоци. Ваквото еднонасочно учење често доведува до нецелосно разбирање при учење и резултира со пасивност. Поради тоа, многу средношколци сметаат дека не можат да го искористат своето знаење за да влијаат во општеството.

Затоа, Service Learning програмите ти даваат шанса да:

• Го трансформираш теоретското знаење стекнато од наставата во практична примена
• Развиеш вештини кои немаш можност да ги стекнеш во училишните клупи
• Добиеш мотивација да влијаеш во заедницата

КОЈА Е УЛОГАТА НА НАСТАВНИКОТ?

„Проектот не е проект на наставникот, туку проект на учениците.“ Улогата на наставникот во целиот проект е да биде поддржувач на учениците и да ја следни нивната работа, но да не меша директно во реализација на проектот. Наставникот треба да обезбеди средина каде што ученциите ќе го почувствуваат искуството да реализираат самостојно свој проект. Знаеме дека наставниците имаат поголемо искуство и знаење, но доколку им овозможат на учениците сами да планираат, реализираат, грешат и учат, ќе им одземат важен дел од самото искуство.

Што треба да прави наставникот?

• Да присуствува на состаноците кои ги организира тимот, но да не ги води истите
• Да ги охрабрува учениците и доколку наидат на предизвик да им помогне сами да го најдат решението
• На барање на учениците да им обезбеди контакт или логистичка информација

Што не треба да прави наставникот?

• Да дава идеи за реализација на проектот
• Да го координира целиот проект
• Да дава улоги и задачи на учениците
• Да им ги решава проблемите и предизвиците на учениците
• Да завршува логистички работи за проектот

Заинтересиран/а си но имаш уште прашања?

За сите заинтересирани тимови ќе организираме информативна сесија, која ќе се одржи на 4 септември од 12.00ч онлајн на платформата ЗУМ. За да учествуваш на сесијата потребно е да се регистрираш најдоцна до 3 септември на следниот ЛИНК.

Оваа активност се спродува во рамки на проектот „LEADing Forward: зајакнување на капацитетите за одржлив развој“. Проектот е поддржан со оперативен грант на регионалниот проект СМАРТ Балкан - Граѓанското општество за поврзан Западен Балкан, кој го спроведуваат Centar za promociju civilnog društva (CPCD) од Босна и Херцеговина, Центарот за истражување и креирање политики (ЦИКП) од Северна Македонија и Институтот за демократија и Медијација (ИДМ) од Албанија, а финансиски е поддржан од Министерството за надворешни работи на Кралството Норвешка.